फेरि वनप्लस स्मार्टफोनमाथि प्रतिबन्ध किन हुँदै छ यस्तो
जर्मनीमा फेरि एकपटक वनप्लस र यसको अभिभावक कम्पनी ओप्पोमाथि प्रतिबन्ध लागेको छ। यसपटक प्रतिबन्धको कारण फाइभजी तथा अन्य अत्याधुनिक मोबाइल प्रविधिमा आधारित पेटेन्ट विवाद हो, जसको मुद्धा इन्टरडिजिटल नामक कम्पनीसँग उठेको छ। यसअघि पनि नोकियासँगको पेटेन्ट विवादका कारण वनप्लस र ओप्पोका उत्पादनहरू जर्मनीमा प्रतिबन्धित भएका थिए। यद्यपि, नोकियासँगको विवाद समाधान भए पनि इन्टरडिजिटलसँगको नयाँ विवादले फेरि चिनियाँ स्मार्टफोन निर्मातालाई जर्मनीमा ठूलो झट्का लागेको छ।
इन्टरडिजिटलसँगको यो नयाँ विवादमा फाइभजी टेक्नोलोजी तथा अत्याधुनिक वायरलेस कम्युनिकेसन प्रविधि सम्बन्धी पेटेन्ट अधिकारहरू केन्द्रित रहेको बताइएको छ। यो विवादले जर्मनीमा वनप्लसका स्मार्टफोनहरूको बिक्रीमा पूर्ण प्रतिबन्ध लगाएको छ। यस कारण वनप्लसको अनलाइन स्टोरमा लोकप्रिय वनप्लस १२ लगायतका स्मार्टफोनहरू उपलब्ध हुन छाडेका छन्।
वनप्लसका फ्यानहरू यस निर्णयबाट निराश भएका छन्, विशेषगरी जर्मनीजस्तो ठूलो बजारमा यस्तो समस्या उत्पन्न हुँदा ब्रान्डका लागि गम्भीर असर पर्ने देखिन्छ। कम्पनीले छिट्टै समाधान खोजेर पुनः आफ्नो उत्पादनहरू जर्मनीको बजारमा ल्याउने आशा व्यक्त गरेको छ। तर, पेटेन्ट मुद्दाहरू प्रायः जटिल र लामो समयसम्म तानिने भएकाले यो विवादले कम्पनीलाई थप चुनौतीहरूको सामना गर्न बाध्य पार्न सक्छ।
जर्मनीमा यस्तो प्रतिबन्ध लगिनु चिनियाँ कम्पनीहरूको लागि मात्र होइन, युरोपको स्मार्टफोन बजारकै लागि ठूलो घटना हो। फाइभजी प्रविधि र पेटेन्ट विवादको कारणले अन्य स्मार्टफोन निर्माताहरूले पनि भविष्यमा यस्तै समस्या झेल्नुपर्ने सम्भावना देखिन्छ। यसले गर्दा स्मार्टफोन उद्योगमा पेटेन्ट अधिकारहरू बारे थप बहस र कानुनी चुनौतिहरू उब्जने अपेक्षा गरिएको छ।
वनप्लस र ओप्पो दुवै कम्पनीहरूले जर्मनीको अदालतमा अपील गर्ने तयारी गरिरहेका छन्। तर, फाइभजी प्रविधिमा आधारित पेटेन्ट अधिकारका मुद्दाहरूले कानुनी रूपमा जटिलता थपेकाले समाधानका लागि लामो समय लाग्न सक्छ।
