बालबालिकाको श्रम शोषण ३ लाख ९१ हजार जरिवाना
श्रम तथा रोजगार कार्यालय हेटौँडाले बालश्रमिकको रूपमा बालबालिकालाई काममा लगाउने ३५ उद्योग प्रतिष्ठान तथा रोजगारदातामाथि कारबाही गर्दै ३ लाख ९१ हजार रुपैयाँ जरिवाना गरेको छ। आर्थिक वर्ष २०८०/८१ मा गरिएको अनुगमनका क्रममा, ९५ उद्योग प्रतिष्ठानमध्ये ३५ वटा प्रतिष्ठानले बालश्रमिक प्रयोग गरेको पाइएपछि उक्त कारबाही गरिएको हो।
कार्यालयका प्रमुख छन्दनारायण श्रेष्ठका अनुसार, बालश्रमिकका रूपमा काम गराइएका बालबालिकाको उद्धार गरिएको छ, र दोषी ठहरिएका उद्योग तथा रोजगारदातालाई कारबाही गर्दै ६१ हजार एक सय रुपैयाँ र ३ लाख ९१ हजार दुई सय ५६ रुपैयाँ जरिवाना गरिएको छ।
यो अवधिमा कार्यालयले २३५ प्रतिष्ठानमा अनुगमन गर्दा, ठूला उद्योगहरूले श्रम कानुनको पालना गरेको देखिए पनि साना उद्योगहरूमा नियुक्तिपत्र, न्यूनतम पारिश्रमिक, सामाजिक सुरक्षा, र व्यवसायजन्य सुरक्षाको अवस्था कमजोर रहेको पाइएको छ। कार्यालय प्रमुख श्रेष्ठले कमजोर देखिएका उद्योगहरूलाई सुधार गर्न निर्देशन दिइएको र श्रमिक तथा व्यवस्थापकहरूलाई समेटेर सचेतनामूलक कार्यक्रम सञ्चालन गरिएको बताए।
हाल हेटौँडा श्रम तथा रोजगार कार्यालयमा ५० वटा उद्योग प्रतिष्ठान सूचीकृत छन् भने एक सय ५० प्रतिष्ठानलाई सूचीकृत हुन ताकेता गरिएको छ। कार्यालय प्रमुख श्रेष्ठका अनुसार, धेरैजसो उजुरीहरू पारिश्रमिक नपाएको सम्बन्धमा आउने गरेका छन्। आर्थिक वर्ष २०८०/८१ मा पारिश्रमिकसम्बन्धी ७९ उजुरी दर्ता भएका थिए, जसमा ६० उजुरी कार्यालयको पहलमा प्रत्यक्ष वार्तामार्फत समाधान गरिएको छ भने बाँकी १९ उजुरी समाधानको प्रक्रियामा छन्।
यस अवधिमा, मकवानपुर, चितवन, र सिन्धुली जिल्लामा विभिन्न सचेतनामूलक कार्यक्रम पनि सम्पन्न गरिएको कार्यालय प्रमुख श्रेष्ठले जानकारी दिए।
