जापानमा एक्लोपनको संकट: ४ हजार मानिसको शव एक महिनापछि मात्रै भेटियो
जापानमा एक्लोपनको समस्या गम्भीर रूपमा उक्लिरहेको छ। यस वर्षको पहिलो छ महिनामा ४० हजारभन्दा बढी मानिस आफ्नै घरमा एक्लै मृत अवस्थामा फेला परेका छन्। यो तथ्यांक जापानको राष्ट्रिय पुलिस एजेन्सीले हालै सार्वजनिक गरेको रिपोर्टमा समावेश गरिएको छ, जसले देशमा एक्लोपनको गम्भीर समस्यालाई उजागर गरेको छ।
रिपोर्टअनुसार ती ४० हजार मृतकहरूमध्ये करिब ४ हजार जनाको शव उनीहरूको मृत्युको एक महिनापछि मात्रै फेला परेको थियो। यो मात्र होइन, एक सय ३० जनाको मृत्यु भएको झन्डै एक वर्षसम्म पनि कसैले थाहा पाएका थिएनन्।
यो तथ्यांक जापानमा बढ्दो वृद्ध जनसंख्याका कारण देखा परेको एक्लोपनको प्रत्यक्ष परिणाम हो। संयुक्त राष्ट्र संघका अनुसार जापानमा वृद्ध जनसंख्या विश्वमै सबैभन्दा धेरै छ। देशमा जीवनशैलीमा आएको परिवर्तन, परिवारिक सम्बन्धमा आउने दूरी, र एकल जीवन बिताउने वृद्धहरूको संख्या वृद्धि हुनु यो समस्याका प्रमुख कारक हुन्।
रिपोर्टमा उल्लेख भएअनुसार, एक्लै बस्ने करिब ३७ हजार २२७ जना आफ्नै घरमा मृत फेला परेका थिए, जसमा ७० प्रतिशतभन्दा बढी ६५ वर्ष माथिका थिए। करिब ४० प्रतिशत मानिसको शव मृत्यु भएको एक दिनभित्रै फेला परेका थिए, तर लगभग ३ हजार ३९३ जनाको शव एक महिनापछि मात्र पत्ता लाग्यो। बाँकी रहेका १३० जनाको मृत्युपछि पनि लामो समयसम्म कसैले उनीहरूको स्थितिबारे चासो नदिएको देखिन्छ।
जापानको पब्लिक टेलिभिजन नेटवर्क एनएचकेका अनुसार प्रहरीले यो तथ्यांक सरकारको एक समूहलाई उपलब्ध गराएको छ, जसले बेवारिसे मृत्युका घटनाहरूको जाँच गरिरहेको छ। यो समस्या जापानमा अहिले सामाजिक सुरक्षाको महत्वपूर्ण मुद्दा बनेको छ।
यस रिपोर्टपछि जापानी प्रहरी एजेन्सीले देशमा एक्लोपनबाट ग्रस्त वृद्ध वर्गको जीवन र मरणबारे गम्भीर सोच विचार गर्नुपर्ने देखिएको बताएको छ। यस संकटले जापानको सामाजिक सुरक्षामा चुनौती थपेको छ, जहाँ वृद्धहरूको संख्या सन् २०५० सम्म १ करोड ८ लाख पुग्नसक्ने प्रक्षेपण छ।
जापानमा वृद्ध वर्गको एक्लोपन समस्या गम्भीर बन्दै गएको छ। सामाजिक सम्बन्धको कमी र वृद्धहरूको एकल जीवनले निम्त्याएको यो समस्या समाधान गर्न तत्काल कदम चाल्नुपर्ने आवश्यकता छ।
